بادلی کے موجودہ ممبر اسمبلی نے علاقے کی ترقی کےلئے کچھ نہیں کیا، اب جب وہ ووٹ مانگنے آئے تو پوچھنا کہ وہ پچھلے 5 سالوں سے کہاں تھے:دیویندر یادو
نئی دہلی، 19 جنوری(ایس ٹی بیورو)جیسے جیسے انتخابات کی تاریخ نزدیک آرہی ہے ویسے ویسے امیدواروں کے جوش و خروش میں بھی اضافہ ہورہا ہے۔ اب جبکہ پرچہ نامزدگی کی تاریخ نکل چکی ہے اور اب باقاعدہ انتخابی سرگرمیاں عروج پر پہنچ چکی ہیں۔ اس بار کانگریس پارٹی دہلی اسمبلی کے انتخابات میں پورا دم خم لگا رکھا ہے۔ دہلی پردیش کانگریس کے صدر دیوندر یادو کی قیادت میں کانگریس بہت ہی سنجیدگی اور حکمت عملی کے تحت الیکشن لڑ رہی ہے جس سے کانگریسی کارکنان میں بھی ایک الگ ہی جوش دیکھنے کو مل رہا ہے۔ دہلی پردیش کانگریس کمیٹی کے صدر اور بادلی اسمبلی حلقہ سے کانگریس کے امیدوار دیویندر یادو نے آج اپنی انتخابی مہم میں 5 انتخابی ریلیوں سے خطاب کیا اور عوامی رابطہ مہم کے ایک حصے کے طور پر لوگوں سے بات چیت کی۔ اسمبلی حلقہ میں گھر گھر جا کر انہوں نے عوام کودرپیش مسائل کے بارے میں بھی جانکاری لی اور عوام کو یقین دلایا کہ 5 فروری کے بعد کانگریس کی حکومت بنے گی۔ دہلی میں حکومت بننے کے بعد عوام کی تمام پریشانیاں ختم ہو جائیں گی۔عوامی رابطہ مہم کے تحت دیویندر یادو نے 12 بجے ایم سی ڈی کالونی، سمے پور میں پہلا جلسہ، دوسرا جلسہ ایک بجے لباس پور، تیسرا جلسہ 3 بجے 40 فٹ روڈ، رانا پارک، چوتھا جلسہ 4 بجے سٹریٹ نمبر 4، کے بلاک، سوروپ نگر، اور پانچویں جلسہ عام کا اہتمام شام 5 بجے یادو مارکیٹ، سوروپ نگر میں کیا اور وہاں موجود سینکڑوں کارکنوں اور اہل علاقہ سے خطاب کیا۔
دیویندر یادو نے کہا کہ آپ کی حمایت سے حکومت بنانے کے بعد کانگریس پارٹی ایک بار پھر شیلا دکشت جی کی 15 سالہ حکومت کی ترقی کی تاریخ کو دہرائے گی۔ دہلی کے عوام کے وہ حقوق بحال ہوں گے جس سے وہ ابھی تک محروم ہیں۔ ہر دہلی والے کے صحت کے حق کے تحت ہم 25 لاکھ روپے کا ہیلتھ انشورنس یقینی بنائیں گے، خواتین کو 2500 روپے ماہانہ دیں گے،بے روزگار نوجوانوں کو 8500 روپے دے کر ان کی پہلی نوکری یقینی بنائیں گے۔ جلسہ عام میں موجود ہزاروں لوگوں سے خطاب کرتے ہوئے دیویندر یادو نے کہا کہ موجودہ ایم ایل اے نے بادلی میں کئے گئے کاموں کو تباہ کرنے کا کام کیا ہے، انہوں نے اپنے ذریعہ کئے گئے کاموں کو آگے لے جانے کا کوئی کام نہیں کیا۔ انہوں نے کہا کہ ہم نے حکومت سے لڑ کر غریب عوام کو تباہی سے بچایا ہے۔ ایم ایل اے رہتے ہوئے انہوں نے بزرگوں کی پنشن اور ہر گھر تک راشن پہنچانے کے لیے راشن کارڈ بنائے ،لیکن راشن بند کرنے کے ساتھ ساتھ موجودہ حکومت نے راشن کارڈ بنانا بھی بند کر دیا۔ میں نے سیوریج لائنیں بچھائی تھیں۔ جیسے ہی میں دوبارہ ایم ایل اے بنوں گا یہاں کے پینے کے پانی، نکاسی اور سیوریج کے مسائل کو ختم کروں گا۔
ایک بڑے اجتماع سے خطاب کرتے ہوئے دیویندر یادو نے کہا کہ مہنگانی مکتی یوجنا کے تحت دہلی کے ہر غریب اور ضرورت مند کو 500 روپے میں ایل پی جی سلنڈر اور ایک راشن کٹ دیا جائے گا جس میں چاول، چینی، تیل، دالیں اور چائے کی پتی بھی ہوگی۔ انہوں نے کہا کہ کانگریس دہلی کے لوگوں کو 300 یونٹ بجلی مفت دے کر مزید فائدہ دے گی، کیونکہ کیجریوال کے 200 یونٹ بجلی میں ایک فراڈ چھپا ہوا ہے، جس میں جیسے ہی200یونٹ سے 1 یونٹ بڑھتا ہے، بل ڈبل ہو جاتا ہے۔ جس کی وجہ سے دہلی کے غریب اور کچی آبادیوں کو مالی مشکلات کا سامنا کرنا پڑ رہا ہے۔ انہوں نے عوام سے کہا کہ بادلی کے موجودہ ایم ایل اے نے اپنے دور میں علاقے کی ترقی اور عوام کی سہولیات کے لیے کچھ نہیں کیا، اب جب وہ آپ کے علاقے میں ووٹ مانگنے آئیں تو ضرور پوچھیں گے کہ وہ گزشتہ 5 سے کہاں تھے؟
No Comments: